KSPH медицина колледжінде 2026 жылғы түлектерге диплом табыстау салтанатты рәсімі өтті
Бүгін, «Қоғамдық денсаулық сақтау жоғары мектебі» Қазақстандық медицина университеті жанындағы KSPH медицина колледжінде 2026 жылғы түлектерге диплом табыстаудың салтанатты рәсімі өтті.
Мерекелік іс-шараға түлектер, олардың ата-аналары, оқытушылар, колледж қызметкерлері және құрметті қонақтар қатысты. Бұл күн жас мамандардың өміріндегі маңызды кезеңнің аяқталып, денсаулық сақтау жүйесіндегі кәсіби жолының басталуын айқындайтын ерекше мереке болды.
Салтанатты рәсім Қазақстан Республикасының Мемлекеттік Әнұранымен ашылды. Түлектерге құттықтау сөз сөйлегендер: «Қоғамдық денсаулық сақтау жоғары мектебі» Қазақстандық медицина университетінің академиялық және ғылыми қызмет жөніндегі проректоры, философия докторы (PhD) Индира Қазбекқызы Төлебаева, сондай-ақ KSPH медицина колледжінің директоры, медицина ғылымдарының кандидаты, жоғары санатты оқытушы Майра Заманбекқызы Сәрсенбаева.
Іс-шара барысында колледждің қоғамдық өміріне белсенді қатысқан студенттердің ата-аналарына Алғыс хаттар табысталды. Сонымен қатар оқу орнының дамуына елеулі үлес қосып, мәдени, спорттық және қоғамдық жұмыстарда белсенділік танытқан түлектер марапатталды.
Мерекенің ең әсерлі әрі толқынысқа толы сәті – «Емдеу ісі», «Зертханалық диагностика», «Фармация» және «Мейіргер ісі» мамандықтарының түлектеріне диплом тапсыру рәсімі болды. Оқуды үздік аяқтап, үздік диплом иегері атанған түлектерге ерекше қошемет көрсетілді.
Мерекелік кештің сәнін домбырашының орындауындағы музыкалық шығарма мен «НАЗАР» шоу-балетінің жарқын концерттік бағдарламасы келтіріп, салтанаттың ерекше сәніне айналды.
Түлектер, кураторлар және ата-аналар атынан айтылған жүрекжарды лебіздерде ұстаздарға кәсіби біліктілігі, қолдауы және болашақ медицина қызметкерлерін даярлауға қосқан өлшеусіз еңбегі үшін шынайы алғыс білдірілді.
KSPH медицина колледжі 2026 жылғы түлектерді оқуын сәтті аяқтауымен шын жүректен құттықтайды! Әрбір түлекке таңдаған кәсіби жолында сенімді қадам басып, білімін үздіксіз жетілдіріп, медицина этикасының қағидаттарына адал болып, медицина қызметкері деген жоғары мәртебені абыроймен алып жүруіне тілектеспіз.
Алған білімдеріңіз табысты еңбек жолының берік негізіне айналып, адамдарға көмек көрсетуге деген ұмтылыс, кәсібилік пен мейірімділік өмір бойы серіктеріңіз болсын.
Барша түлектерді осы айтулы оқиғамен құттықтай отырып, зор кәсіби жетістіктер, мықты денсаулық, бақ-береке және жаңа белестер тілейміз!
