2025 жылғы 24 қазанда халықаралық сертификаттау органы «TQCSI (Kazakhstan)» Қазақстан медицина университетінің «ҚДСЖМ» сапа менеджменті жүйесіне ISO 9001:2015 стандарты талаптарына сәйкестігін растау мақсатында қайта сертификаттау аудитін өткізді.
Тексеру нәтижелері бойынша сапа менеджменті жүйесінің табысты жұмыс істейтіні және үздіксіз жетілдіру қағидаттарына сәйкес дамып келе жатқаны расталды. Сәйкесіздік анықталған жоқ.
Аудитті халықаралық сертификаттау органы «TQCSI (Kazakhstan)» жетекші және тәуелсіз аудиторлары жүргізді.Аудиторлық топтың жетекшісі – Турдалиева Г.Р., Аудитор – Оналбаева В.Н.
Тиімді және үнемі жетілдіріліп отыратын сапа менеджменті жүйесінің болуы университет жұмысының жоғары деңгейінің, оның тұрақтылығы мен ұлттық және халықаралық деңгейдегі бәсекеге қабілеттілігінің кепілі болып табылады.
Аудит барысында сапа менеджменті жүйесін енгізу, қолдау және жетілдірудің нәтижелілігі қарастырылды. Бұл деректер сапа саласындағы Саясаттың бағыттарына сай болуымен, мақсатты көрсеткіштердің орындалуымен және университеттің негізгі процестерін жақсарту нәтижелерімен расталды. Сыртқы аудиттің қорытынды жиналысында сарапшылар сапа менеджменті жүйесінің даму деңгейінің жоғарылығын, қызметкерлердің кәсібилігі мен белсенді қатысуын, сондай-ақ университеттің үздіксіз даму ұмтылысын атап өтті.
