2024 жылдың 5-7 желтоқсанында Алматы қаласында «ҚДСЖМ» Қазақстандық медицина университеті , Алматы қаласы клиникалар қауымдастығы, Ассоциация менеджменті және қоғамдық денсаулық сақтау ұйымы, Симуляциялық оқыту және тәуелсіз сараптама одағы, сондай-ақ AMC TELEDOC International Pte халықаралық орталығы ұйымдастырған Халықаралық «Global Health» конгресі өтті.
Конгреске Қазақстан Республикасы ғылыми және білім беру ұйымдарының жетекші ғалымдары мен мамандары, мемлекеттік органдар өкілдері, Әлеуметтік медициналық сақтандыру қорының өкілдері, сондай-ақ жақын және алыс шетелдерден (ДДСҰ, Литва Республикасы, Испания, АҚШ, Қырғыз Республикасы, Өзбекстан Республикасы, Ресей Федерациясы, Украина) келген денсаулық сақтау саласының сарапшылары қатысты.
Конгрестің пленарлық бөлімінде құрметті қонақтар мен жетекші сарапшылар сөз сөйледі, олардың қатарында ҚР ҰҒА академигі Локшин В.Н., Әзербайжанның еңбек сіңірген қайраткері, профессор Гельфгат Е.Б., ДДСҰ Еуропалық аймақтық бюросының өкілдері доктор Moredreck Chibi (Копенгаген), Thanos Myloneros (Афины), Еуропалық Одақ кеңесшісі, профессор Йозас Галдикас және басқалар болды.
Конгресс нәтижелері:
Конгресс қатысушылары постпандемия кезеңінде қоғамдық денсаулық сақтау мен денсаулық сақтау саласына, әлеуметтік-экономикалық аспектілерге, цифрлық трансформацияға және жасанды интеллекттің енуіне ерекше назар аудару қажеттігін атап өтті.
Ұсыныстар:
- Медициналық мамандықтар номенклатурасын қайта қарау және отандық кәсіби терминологияда «қоғамдық денсаулық», «қоғамдық денсаулық сақтау», «денсаулық сақтау менеджменті» ұғымдарын нақтылау.
- Мамандықтардың функциялары мен құзыреттерін жүйелеу.
- «Қоғамдық денсаулық сақтау» және «Денсаулық сақтау менеджменті» мамандықтары бойынша кадрларды даярлау процесін жетілдіру.
- Білім беру бағдарламаларын заманауи медициналық жетістіктер мен технологияларға сәйкес жүйелі түрде жаңарту.
- Барлық деңгейдегі білім беру бағдарламаларына «Медициналық көмектің сапасы» пәнін енгізу (90 кредиттен кем емес көлемде).
- Қаржы ресурстарын медициналық қызметкерлердің өз біліктілігін арттыруы үшін аудару.
- Нормативтік-құқықтық базаны қайта қарау және қажетсіз реттеуді жою.
- Пациенттер мен қоғамды медициналық көмекке қатысты мәселелерді шешуге белсенді тарту.
- Жасанды интеллектті енгізу саласындағы этикалық және ұйымдастырушылық аспектілерге назар аудара отырып, инновацияларды қолдау.
- Медициналық ұйымдарда корпоративтік басқарудың тиімділігін арттыру.
- Медициналық қызметкерлердің кәсіби жауапкершілігін сақтандыру жүйесін жалғастыру.
Бұл ұсыныстар денсаулық сақтау жүйесінің әлеуетін арттыруға және медициналық қызметтердің сапасын жақсартуға ықпал етеді.
