Қазақстандық медициналық университет «Қоғамдық денсаулық сақтау жоғары мектебі» 2025–2026 оқу жылында клиникалық мамандықтар бойынша 138 резидентті оқуға қабылдады. Қабылдау үдерісі 20 білім беру бағдарламасы бойынша жүргізілді, бұл мамандарды даярлаудың кең ауқымын қамтитынын көрсетеді.
Жаңа резиденттермен алғашқы кездесу оқу жылының басында университетте өтті. Резиденттерге құттықтау сөздері мен ізгі тілектерін университет ректоры Ардак Муханбетжанова, клиникалық қызмет жөніндегі проректор Ауесхан Төлегенұлы, сондай-ақ кафедра және курс меңгерушілері жолдады.
Қабылданған резиденттердің ішінде:
- 34 резидент жергілікті атқарушы органдардың мемлекеттік гранттары бойынша оқуға түсті;
- 104 резидент келісімшарттық (ақылы) негізде білім алуда.
Бүгінгі күні «ҚДСЖМ» КМУ- де барлығы 248 резидент білім алуда. Оқу процесін сапалы ұйымдастыруға 10 кафедра және 6 клиникалық курс тартылған, бұл болашақ мамандарды түрлі медицина салаларында жоғары деңгейде даярлауға мүмкіндік береді.
