2026 жылғы 20 қарашада Zakon.kz республикалық ақпараттық порталында «Смартфондағы емхана: Қазақстандағы алғашқы медициналық көмек қандай болуы мүмкін» атты мақала жарияланды. Мақала «ҚДСЖМ» Қазақстандық медицина университетінің жетекші ғалымдарының қатысуымен әзірленген алғашқы медициналық-санитариялық көмекті (МСАК) дамытудың жаңа тұжырымдамасына арналған.
Тұжырымдаманың авторлары — медицина ғылымдарының докторы, «ҚДСЖМ» Қазақстандық медицина университетінің профессоры Құралбай Құрақбаев, медицина ғылымдарының докторы, университет профессоры, Дүниежүзілік денсаулық сақтау ұйымының консультанты Уәлихан Ахметов, сондай-ақ Алматы қаласы клиникалары қауымдастығының атқарушы директоры, MBA PH, Қазақстан Республикасы Денсаулық сақтау министрлігінің заңнама мәселелері жөніндегі консультанты, Әлеуметтік медициналық сақтандыру қоры Қоғамдық кеңесінің мүшесі Расул Дюсенов.
Ұсынылған тұжырымдама заманауи цифрлық технологияларды енгізу, медициналық қызметтердің қолжетімділігін арттыру және пациентке бағдарланған денсаулық сақтау моделін қалыптастыру арқылы Қазақстанның алғашқы медициналық-санитариялық көмек жүйесін жетілдіруге бағытталған.
Ғылыми бастаманың негізгі идеясы — емхананың дәстүрлі моделінен медициналық қызметтердің едәуір бөлігі қашықтан көрсетілетін интеграцияланған медициналық сүйемелдеу жүйесіне көшу.
Ұсынылып отырған модель шеңберінде пациенттерді, дәрігерлерді және медициналық ұйымдарды біріктіретін бірыңғай цифрлық платформа құру мүмкіндігі қарастырылған. Мұндай жүйе азаматтарға қашықтан консультация алуға, зертханалық зерттеулердің нәтижелерін бақылауға, электрондық медициналық құжаттаманы пайдалануға және емханаға жеке бармай-ақ медициналық қызмет көрсетуге қатысты жекелеген мәселелерді шешуге мүмкіндік береді деп болжануда.
Авторлар өтініштерді алдын ала талдау, медициналық тәуекелдерді бағалау және пациенттерді бағыттау үдерісін оңтайландыру үшін жасанды интеллект технологияларын қолдануға ерекше назар аударады. Сонымен қатар цифрлық шешімдер кәсіби дәрігерлік көмекті алмастырмай, медицина мамандарын қолдау құралы ретінде қызмет етуге тиіс екені атап өтіледі.
Тұжырымдаманың маңызды бағыттарының бірі — профилактикалық медицинаны дамыту, ауруларды ерте анықтау және пациенттерді, соның ішінде созылмалы аурулары бар адамдарды кешенді сүйемелдеу.
Ұсынылған модельді әзірлеу барысында ғалымдар Қазақстанның ұлттық денсаулық сақтау жүйесінің ерекшеліктері мен цифрландыру саласындағы қол жеткізілген нәтижелерді ескере отырып, алғашқы медициналық көмекті ұйымдастырудың халықаралық тәжірибесіне сүйенді.
Ұсынылған бастама тұжырымдамалық сипатқа ие және оны одан әрі ғылыми талқылауды, іске асыру тетіктерін пысықтауды, сондай-ақ жекелеген шешімдерді медициналық ұйымдарда сынақтан өткізу мүмкіндігін көздейді.
«ҚДСЖМ» Қазақстандық медицина университеті өкілдерінің зерттеулері мен сараптамалық ұсыныстарының республикалық бұқаралық ақпарат құралында жариялануы университеттің отандық денсаулық сақтауды жаңғыртудың стратегиялық бағыттарын талқылауға қосқан ғылыми-сараптамалық үлесін көрсетеді.
«ҚДСЖМ» Қазақстандық медицина университеті қоғамдық денсаулық сақтау жүйесін жетілдіруге, инновациялық тәсілдерді енгізуге, сондай-ақ халыққа көрсетілетін медициналық көмектің сапасы мен қолжетімділігін арттыруға бағытталған ғылыми және сараптамалық қызметін жалғастыруда.
Дереккөз: Zakon.kz, 2026 жылғы 20 қараша.
Жарияланымның түпнұсқасы: https://www.zakon.kz/stati/6539116-poliklinika-v-smartfone-kakoy-mozhet-stat-pervichnaya-meditsina-v-kazakhstane.html
